Rursum si verecundie erubescentia te conturbet: nec propter illam confessio postponenda est: quia erubescentia quam in confessione pateris: non solum est secundum doctores magna pars satisfactionis: sed etiam videtur anime magnum decorem inducere. Iuxta illud Psalmiste: Confessionem et decorem induisti. Unde quanto rubor verecundie fuerit maior: tanto in anima maior erit decor et anima pulchrior: faciente tamen hoc principali rubore ignee caritatis ipsam verecundam confessionem imperantis. Denique quamuis ante confessionem et contritionem peccata tua sint nota deo et celestis patrie ciuibus non paucis: quos etiam occulta nostra non latent: ab eorum tamen oculis seu noticia per confessionem fideliter peracta subtrahuntur: cum deus ipse ignoscat quasi ex tunc non noscat: et ab aliis ea abscondat. Unde audi Augustinum. quo pacto iudex deus et assessores peccata agnoscant: Iusticia inquit de celo prospexit tanquam dei dicentis: Parcamus homini huic quia ipse sibi non pepercit: ignoscamus quia ipse agnoscit: conuersus est ad penitendum peccatum suum: conuertar et ego ad liberandum eum. hec Augustinus.