Denique de morte tempestiua si bene intelligeres: plus gaudere quam turbari deberes. Unde Uincentius. Quidam ad sanctum ludouicum francorum regem sic scribit. Mors iudex est cuius iudicio subiiciuntur et omnes reges et imperatores. Iudex iste ternam citationem secundum iuris formam solet facere. Prima est egritudo: secunda est corporis defectio: tertia vero peremptoria est: quam non per nuncium facit sed ipsamet venit. Quandoque tamen pro tribus vnam facit: quando scilicet iudex summus sub quo mors est iudex delegatus ex aliqua causa vult festinare. Nam electos suos quandoque citius euocat ne cadant: malos etiam ne peccatis peccata superaddant: hec ille.