Preterea super habitatione arta non turberis: que eo magis tibi conuenit quam ampla et lata et spaciosa: quo minus eris in ipsa arta distractus et magis remanebis recollectus. Distractio enim quam spaciosa habitationum loca operantur nonnunquam virtutes euacuat. Econtra artum habitaculum quo se frequentantium excludit turbas hominum: eo virtutum multitudinem ad se inuitat: quarum ingressum artitudo non impedit: sed magis ad eam mentem recolligendo disponit. Hinc est quod Ualerius ille maximus dicit: Humile tugurium virtutes recipit: Angustus locus magnarum virtutum turbam capit. Sed profecto melius est associari turbe virtutum quam hominum. Quod et ipse Ualerius ioco virtuoso patientissimi diogenis ostendit. Diogenes inquit cum torqueretur in dolio: se domum volubilem habere iocundabatur: et se cum temporibus commutantem. Frigore enim os dolii vertebat in meridiem: estate ad septemtrionem: et vbicunque se sol inclinauerat: diogenis simul pretorium vertebatur.